Reagon SHBA: Deklarata e Presidentit ngre shqetësime serioze rreth angazhimit të Maqedonisë për mbisundimin e të drejtës”. Kreu i opozitës, Zoran Zaev, e cilëson grusht shteti dhe kërkon dorëheqjen e kreut të shtetit.
Presidenti i Maqedonisë, Gjorge Ivanov, ka firmosur faljen për të gjithë politikanët, të cilët janë nën hetime. Me vendimin e Presidentit të Maqedonisë, falen të gjithë ata politikanë, ndaj të cilëve është ngritur procedure hetimore, si dhe për një politikan, i cili është duke vuajtur dënimin me burg.
Mediat në Maqedoni shkruajnë se Ivanov nuk ka nënvizuar se për cilët politikanë bëhet fjalë, por ka theksuar se vendimin e ka marrë vetë dhe se për këtë nuk i ka njoftuar politikanët për arsye se ndoshta ndonjëri prej tyre ndihet i pafajshëm dhe këtë dëshiron ta tregoj përmes procedurës gjyqësore.
Ndërkohë zhurnal.mk shkruan se Ivanov ka amnistuar nga veprat penale ish-shefin e policisë sekrete, Sasho Mijallkov, ish-ministren Gordana Jankullovska, kryetarin e LSDM-së, Zoran Zaev dhe ish-ministrin e Brendshëm në vitin 2001, Ljube Boshkovski. Në këtë listë të amnistimit gjendet edhe ish-ministri i Transportit, Mile Janakievski.
Për vendimin e Presidentit të Maqedonisë ka reaguar menjëherë ambasada amerikane. Në një deklaratë për mediat theksohet: “Po kërkojmë detaje dhe sqarime të mëtejshme. Deklarata e Presidentit gjithsesi ngre shqetësime serioze rreth angazhimit të Maqedonisë për mbisundimin e të drejtës”.
Ndërsa lideri i opozitës në Maqedoni, Zoran Zaev e ka cilësuar grusht shteti dhe ka kërkuar dorëheqjen e Presidentit Ivanov.
“Grush shteti ndaj Maqedonisë. Vendimi i Ivanovit është tentativë për shpëtim nga krimi dhe korrupsioni që i kanë bërë shtetit. Ivanov u bë pjesë e krimit. Prej sot nuk ekziston shteti i së drejtës. Shkelen ligjet, Kushtetuta, qytetarët e Maqedonisë. Sot, e varrosën Marrëveshjen e Përzhinës. Prej sot bashkë me qytetarët do ta kthejmë dinjitetin e shtetit. Kërkojmë nga Ivanov të japë dorëheqje. Kuvendi duhet të mblidhet dhe të debatoj rreth vendimit të Ivanovit. Kriminelët duhet të përgjigjen për krimet”, tha Zaev.
