Zëdhënësja e KE-së, Maja Kocijançiç është shprehur se nuk ka pasur njoftim të dërguar në Komisionin Evropian, që t’i kërkohet të ndërmarrë një vendim për pezullimin e regjimit të liberalizimit të vizave me Shqipërinë.
Në një intervistë për “European Western Balkans”, Kocijançiç tha që pozicioni i Komisionit i shprehur të mërkurën nga zëdhënësja, Natasha Bertaud mbetet i njëjti.
“Komisioni është në dijeni të votimit dje të mocionit në Parlamentin holandez, por ka një procedurë specifike që është në fuqi mbi pezullimin e mekanizmit të vizave dhe, deri tani, nuk kemi marrë asnjë njoftim nga asnjë shtet anëtare që të kërkojë aktivizimin e mekanizmit të vizave për ndonjë vend që përfiton nga udhëtimi i lirë pa viza. Nëse Komisioni do të marrë një njoftim të tillë, ai do e analizojë me kujdes, do e vlerësojë dhe do të vendosë nëse ky veprim nevojitet, duke theksuar rolin kryesor që ka ky organizëm në këtë proces”, u shpreh Kocijançiç.
