Kërkesa e PD për të ngritur një Komision Hetimor për privatizimin e CEZ nuk është pranuar nga ana e mazhorancës në mbledhjen e Konferencës së Kryetarëve sot.
Deputeti Edmond Spaho tha se mazhoranca po përdor truke për të penguar nismat e opozitës.
“Në diskutimet që patëm me konferencën e kryetarëve, mazhoranca vazhdon me praktikat e vjetra të kundërshtimit të iniciativave të opozitës për të ngritur komisione hetimore parlamentare me argumentat që janë adresuar njëherë e mirë nga Gjykata Kushtetuese, si argument që paralelisht po heton edhe prokuroria për këtë çështje. Gjykata Kushtetuese është shprehur në vitin 2014 në rastin e kërkesës për komision hetimor për serverin e tatimeve. Mazhoranca përdor truke duke propozuar që komisionit hetimor të propozuar nga ne ti zgjerohet fusha e aktivitetit duke hetuar edhe marrëveshjen për privatizimin e CEZ dhe zbatimin e kësaj marrëveshje gjatë viteve që funksionoi privatizimi”, u shpreh ai për mediat.
Spaho tha se u la afat deri të enjten, në mënyrë që mazhoranca të konsultohet me vendimet e Gjykatës Kushtetuese. Ai tha se opozita do të japë votën e saj për ngritjen e komisionit në mënyrë që mazhoranca të hetojë.
