Sekretarja e marrëdhënieve me publikun në PD, Grida Duma tha se kjo është skema e Edi Ramës në ndarjen e parave dhe copëtimin e pasurisë të shqiptarëve
“Kryeministri Rama e ka dhënë pa garë e pa transparencë, projektin më të rëndësishëm energjitik në Shqipëri, ndërtimin e hidrocentralit të Skavicës, një kompanie turke, Suzer & Nurol Group”. Akuza ndaj kryeministrit vjen nga Partia Demokratike. Sekretarja e marrëdhënieve me publikun në PD, Grida Duma, tha për mediat se opozita e kishte denoncuar një gjë të tillë por Rama e pati mohuar. Duma theksoi se Ministri Ahmetaj pohon vetë se Skavica i është dhënë një kompanie turke. Ajo ka publikuar videon ku ministri Ahmetaj pohon në një media se Skavica i është dhënë një kompanie turke.
“Në emisionin Zonë e Lirë, duke u gjendur keq që në Shqipëri nuk ka asnjë investitor të huaj, Ahmetaj shprehet se tashmë Skavica i është dhënë kompanisë turke.
Ja video e emisionit: Arben Ahmetaj:”Më thoni një emër që është larguar?! Ju them unë një që ka ardhur. Skavica. Suzer & Nurol Group”. Sot, pyesim kryeministrin Rama se çfarë gare zhvilloi për projektin më të rëndësishëm energjitik të shqiptarëve? Skavica ka përfunduar si gjithë të tjerat dhe siç ne paralajmëruam pa garë e transparencë ashtu siç Rama u ka dhënë miqve të vetë koncensionet në shëndetësi, ashtu siç jep tenderat dhe u hap traun e doganës, ashtu siç negocioi fshehtas vjedhjen e shekullit, aferën CEZ ku iu mori shqiptarëve 600 milionë euro nga xhepat dhe taksat e tyre. Kjo është skema e Edi Ramës në ndarjen e parave dhe copëtimin e pasurisë të shqiptarëve. Mos u habisni kur të merrni vesh që pazari i radhës i Edi Ramës me pasuritë publike është mbyllur në Majami”, tha Grida Duma.
