Këshilli Botëror i Turizmit parashikon rritje edhe për 2016
Shqipëria renditet e 120-ta në botë për madhësinë e sektorit të turizmit në ekonominë e vendit. Këshilli Botëror i Turizmit në raportin e fundit për vitin 2016 ka përllogaritur ndikimin e sektorit të turizmit në ekonominë shqiptare. Sipas vlerësimeve për vitin 2015, kontributi direkt u llogarit në 6 për qind të Prodhimit të Brendshëm Bruto ose e shprehur në vlerë afërsisht në 88 miliardë lekë. Ndërkohë sipas përllogaritjeve është parashikuar që edhe gjatë 2016, rritja të jetë po 6 për qind duke arritur në mbi 92 miliardë lekë. Raporti ka përfshirë në përllogaritjet e tij aktivitetin e gjeneruar nga degët e ndryshme të industries turistike, si hotelet, agjencitë e udhëtimeve, shërbimet e transportit të pasagjerëve, ato të restoranteve, të argëtimit etj.
Raporti ka përllogaritur gjithashtu se kontributi direkt i turizmit në punësim ka qenë me 51,000 vende pune ose sa 5.5 për qind e totalit të punësimit. Edhe kjo shifër parashikohet të rritet me 3.4 për qind në vitin 2016. Një tregues tjetër i matur është edhe raporti turizëm eksporte. Sipas raportit vitin e kaluar, eksporti i turistëve gjeneroi mbi 204 miliardë lekë ose sa 33 për qind e totalit të eksporteve. Treguesi po ashtu pritet të rritet me rreth 6 për qind në vitin 2016. Sa u takon investimeve në sektorin e turizmit dhe udhëtimit në vitin 2015 u llogaritën rreth 20 miliardë lekë dhe parashikimi është që kjo të rritet me 1.4 për qind edhe gjatë 2016-s. I krahasuar me fqinjët sektori i turizmit në Shqipëri ka peshë më të madhe në ekonomi se sa në Itali, Turqi e Maqedoni, por raporti është më i vogël nëse krahasohemi me Greqinë, Malin e Zi apo Kroacinë.
