“Ligji i ri shkel liritë dhe të drejtat e njeriut”
PAMECA dhe ICITAP janë shprehur që vitin e kaluar kundër ligjit të “kamerave” për masat shtesë të sigurisë. Më 10 prill dhe 8 maj 2015, gati një vit me parë se projektligji të shkonte në Kuvend, dy misionet kishin vlerësuar se projektligji shkelte liritë dhe të drejtat e njeriut dhe po ashtu kishte nevojë për përcaktim të saktë të kostove financiare. “Kur flasim për mbikëqyrje monitorim në vende publike dhe vende private nga subjekte të ndryshme, kemi të bëjmë me të drejtën e privatësisë”, shkruhet në komentet e ekspertëve te PAMECA që i kujtojnë Policisë së Shtetit se ka një Konventë Europiane për të Drejtat e Njeriut dhe Direktiva të Parlamentit Europian që kanë përcaktuar linjat e mbrojtjes së privatësisë. Ndërkohë Ekspertët ICITAP kanë deklaruar se nisma ishte antikushtetuese dhe kufizonte të drejtat e qytetarëve. Ekspertët shprehen në raport se policia mund të nxisë dhe të inkurajojë bizneset të montojnë këto kamera por kurrsesi nuk mund t’i detyrojë e për më tepër t’i gjobitë nëse nuk i instalojnë. Aktualisht ligji në fjalë, Presidenti Nishani e ka kthyer për rishikim në Kuvend, ndërkohë që ministri Tahiri është shprehur se maxhoranca do të ndërhyjë aty ku ka nevojë për ndryshime.
