Ministri i Financave mbledh drejtuesit e Tatimeve dhe Doganave të Tiranës
Bizneset që ushtronjtë aktivitetin në zonën e ish-Bllokut do të kalojnë në biznese të mëdha, çka do të thotë se dhe detyrimet në shtet do të jenë më të larta. Këto biznese sipas verifikimeve në sistemin fiskal kanë rezultuar nga analiza, si biznese me risk të lartë. Ky vendim u deklarua sot nga Ministri i Financave, Arben Ahmetaj, gjatë një takimi pune që ai zhvilloi me administratës tatimore dhe më pas me atë doganore. Ministri kërkoi nga Drejtoria e Tatimeve të Tiranës të zhvillojë vizita fiskale në bizneset e zonës së ish-bllokut, të cilat sistemi i riskut në tatime i ka klasifikuar me risk të mesëm dhe të lartë
Ministri kërkoi që të përmirësohet mënyra e komunikimit me biznesin, për ti ndërgjegjësuar ata për përgjegjesitë fiskale që kanë. Nga ana tjetër në takimin me Drejtorinë e Doganave të Tiranës, Ministri lidhur me sistemin e riskut kërkoi që të bëhet furnizimi i të gjithë kategorizimit të sistemit të riskut, pra furnizimim me informacion të sistemit me të cilin është aktualisht e pajisur dogana.
Ministri bëri të ditur se për qëllime të rritjes së efikasitetit të kontrollit, hetimi financiar dhe policia doganore do të dalin jashtë territorit të doganës. Gjatë javës së ardhshme, Ministria e Financave, Drejtoria e Përgjithshme e Tatimeve dhe Drejtoria e Përgjithshme e Doganave do të vijojnë takimet me Drejtoritë rajonale për prezantimin e planit operacional dhe përmirësimin e cilësisë së komunikimit dhe shërbimit me tatimpaguesit.
