Punonjës të Agjensisë së Mjedisit u shfaqen me video në emisionin “Stop” duke marrë 3 mijë euro ryshfet për një leje mjedisore
Pas denoncimit në emisionin investigativ “Stop” të rastit të korrupsionit me lejet mjedisore, ministri i Mjedisit, Lefter Koka, shkarkoi nga detyra inspektorin mjedisor që shfaqej në video duke marrë 3 mijë euro ryshfet për leje mjedisore. Koka urdhëroi auditimin e brendshëm të ministrisë për dhënien e lejeve mjedisore. Përmes një njoftimi për mediat, ministria e mjedisit thekson se ministri ka urdhëruar denoncimin e rastit pranë organeve të drejtësisë si dhe ka falenderuar median për denoncimin e rastit korrptiv të zyrtarit të kësaj ministrie.
“Menjëherë pas denoncimit në mbrëmjen e djeshme , në emisionin investigativ “STOP”, në TV KLAN, Ministri I Mjedisit z. Lefter Koka mori masën e shkarkimit nga detyra të z. Taulant Manaj, punonjës pranë Agjensisë Rajonale të Mjedisit(ARM), Tiranë dhe urdhëroi denoncimin e këtij rasti pranë organeve të drejtësisë për ndjekje të mëtejshme.
Ministri i Mjedisit ka urdhëruar ditën e sotme Auditin e brendshëm të Ministrisë, të kontrollojë gjithë proçedurat e pajisjes me leje mjedisore të subjekteve pranë ARM, Tiranë.
Falenderojmë median dhe opinionin publik që falë denoncimeve të ngritura prej tyre, kontribuojnë në rritjen e cilësisë së punës sonë dhe shërbimit ndaj qytetarëve”, theksohet në njoftimin e ministrisë.
