Shkak mungesa e performancës në hetimet për korrupsion ndaj zyrtarëve të lartë
Prokurori i Përgjithshëm Adriatik Llalla ka vendosur largimin e katër prokurorëve, nga njësia Task-Froce antikorrupsion. Katër Prokurorët ishin komanduar në shtator dhe ka vendosur që në krye të kësaj njësie të kthejë prokurorin Gentian Osmani. Përmes një njoftimi për mediat, prokuroria sqaron se zëvëndësimi është vendosur për shkak nuk ka pasur referime për korrupsionin në radhët e zyrtarëve të nivelit të lartë gjatë muajve të fundit nga institucionet e ngarkuara me ligj.
Gentian Osmani e ka drejtuar edhe më parë këtë strukturë deri në muajin Shtator të vitit 2015. Prokurorët e komanduar pranë kësaj Njësie në muajin Shtator 2015 do të rikthehen në pozicionet e tyre të mëparshme. Në vijim, Njësia Task-Force e Prokurorisë për Krime të Rënda, do të përbëhet nga prokurorët që kanë qenë më parë pranë kësaj strukture, duke iu bashkuar edhe disa prokurorë, të cilët do të zhvillojnë hetime për veprat penale me qëllime terroriste. Në total, Njësia e ristrukturuar do të përbëhet nga 8 prokurorë.
Prokurori i Përgjithshëm ka vendosur lëvizjen e drejtuesit të Prokurorisë së Korçës, Alket Mersini, me kërkesë të këtij të fundit, duke e komanduar prokuror pranë Prokurorisë së Tiranës. Në vend të tij, në drejtimin e Prokurorisë së Korçës është komanduar Kol Hysenaj, aktualisht Prokuror në Prokurorinë e Tiranës.
Po me kërkesë të tij, drejtuesi i Prokurorisë së Pukës, Albert Murçaj, është larguar nga ky pozicion, duke u komanduar në Prokurorinë e Shkodrës, ku do të mbajë pozicionin e zëvendësdrejtuesit. Në vendin e tij komandohet Elidiana Morina (Kasa), prokurore në Prokurorinë e Pukës.
