Që t’ia qëllosh në kokë tek Enkel Demi çdo të hënë në orën 20:35 nuk të nevojiten shumë dije apo lexime intensive. Formati më i ri argëtues i cili që prej të hënës ka nisur të transmetohet në ekranin e Televizionit Publik, titullohet “N’kokë”. Ai nuk është vetëm një lojë, por edhe një ballafaqim me dijet dhe kujtesën dhe ç’ka është më e rëndësishmja është se fitohen para.
Prezantuesi thotë se ky është një spektakël që u përshtatet shumë shqiptarëve, ku nuk ka dallim moshe apo krahine. Një emision për të gjithë shqiptarët.
Të vetmet gjëra që lojtarët duhet të dinë janë çmimet. Sa kushton kjo? Po ajo? Këto janë pyetjet që lojtarët si individë apo herë të tjera në lojë si çift apo grupe duhet të dinë.
“N’kokë”, është një format i njohur dhe i parë edhe në televizione të tjera në Europë. Por, nga konceptimi i skenografisë duket sikur je në studiot e RAI-t, por ku flitet dhe po luhet shqip.
“N’kokë”, emisioni i prodhuar nga Club Production e nisi mbarë rrugëtimin e tij në këtë vigjilje të Krishtlindjes në valët e RTSH. Çdo të hënë ju mund ta ndiqni në orën 20.35.
https://youtu.be/I50mjvpMbbk
/rtsh.al/
