Ndonëse opozita dhe maxhoranca ndahen në qëndrime për çështjet e brendshme kur vjen fjala tek siguria janë në një mendje.
Kryetari i Partisë Demokratike Lulzim Basha ka shprehur mbështetje për shpalljen ‘non grata’ dhe dëbimin e diplomatëve iranianë nga qeveria shqiptare, duke e cilësuar veprimtarinë e tyre si rrezik për sigurinë kombëtare.
Por deklarata e Bashës ka një ‘por’ që ka të bëjë me krimin e organizuar brenda vendit. Ai shprehet se ‘Lufta kundër terrorizmit si formë e krimit të organizuar ndërkombëtar, kompromentohet kur ngjashëm nuk zhvillohet luftë pa kompromise ndaj krimit të organizuar brenda vendit’.
“Në emër të Partisë Demokratike dhe opozitës shqiptare, shpreh mbështetjen për shpalljen ‘non grata’ dhe dëbimin e diplomatëve iranianë, me veprimtari në cenim të “statusit të diplomatit” dhe që vë në rrezik Sigurinë Kombëtare.
Partia Demokratike kërkon prej strukturave shtetërore të Sigurisë Kombëtare, përkushtim të qëndrueshëm dhe bashkëpunim të sinqertë e pa zvarritje me aleatët strategjikë si e vetmja garanci për parandalimin dhe neutralizimin e aktiviteteve te tilla në territorin e RSH.
Lufta kundër terrorizmit si formë e krimit të organizuar ndërkombëtar, kompromentohet kur ngjashëm nuk zhvillohet luftë pa kompromise ndaj krimit të organizuar brenda vendit.
Çdo bashkëjetesë shtetërore me krimin e organizuar është kompromentim i luftës ndaj terrorizmit”, deklaron Basha.
