Mesazhi i kryeministrit: I shërbyen atdheut me profesionalizëm
Dy pilotët e Forcave të Armatosura që humbën jetën në aksin ajror këtë të mërkurë do të shpallen “Dëshmor të Atdheut” dhe ceremonia mortore për ta do të bëhet nga shteti. Ministria e Mbrojtjes njofton se homazhet në nderim të dy pilotëve të Forcës Ajrore, “Dëshmorë të Atdheut”, kapiten Floran Deliaj dhe toger Donald Hoxha, të cilët ranë në krye të detyrës si rezultat i rrëzimit të helikopterit EC 145 në Grizhë të Malësisë së Madhe, do të mbahen ditën e enjte datë 07 prill 2016 nga ora 12:00 – 14:00 në mjediset e Pallatit të Kongreseve. Ceremonia e përcjelljes së dy ushtarakëve për në banesën e fundit do të zhvillohet në orën 14:30 në Varrezat e Dëshmorëve.
Ndërkohë në një mesazh ngushëllimi kryeministri Edi Rama thotë se dy pilotët e rënë i shërbyen atdheut me profesionalizëm. “Kapiten Florian Deliaj dhe Toger Donald Hoxha i shërbyen atdheut me profesionalizëm e përkushtim. Nderim për ta, ngushëllime familjeve të tyre”, citohet në mesazhin e kreut të Ekzekutivit.
