Kryetari i Partisë Demokratike Lulzim Basha ka qenë sërish mbrëmjen e sotme në zonën e Unazës së Re për të shprehur protestën bashkë me banorët kundër prishjes së banesave dhe kundër projektit të Unazës së Madhe.
Ai iu ka bërë thirrje qytetarëve të dalin nesër në protestë e t’iu bashkohen studentëve. Basha kërkoi nga qytetarët të mblidhen tek Kuvendi dhe nga nesër të nisin rezistencën.
Kreu i PD tha se plani urbanistik është ndryshuar për të favorizuar një plan ndërtimi të Edmond Begos.
“Pas marrjes së materialeve zyrtare është vërtetuar katërcipërisht se afera e Unazës së Re të Tiranës është shumë më e thellë se sa ajo që ka dalë deri sot në pah. Nga njëra anë Edi Rama qëndron pas vjedhjes së parave të buxhetit të shtetit, parave të qytetarëve shqiptarë me aferën prej 40 milionë eurosh të tenderuar pa konkurrencë dhe në praninë e një kompanie fantazmë të regjistruar në parajsën fiskale të shtetit të Delaware por po kështu të falsifikuar, të dokumenteve të falsifikuara amerikane, prapa të cilave qëndron vetëm një njeri: ai që ka pushtetin të komandojë ministrin e Financave, ministrin e Infrastrukturës, kryetarin e Bashkisë, agjencinë e prokurimit publik, IKM dhe ky është vetëm Edi Rama. Është po kështu i vetmi njeri që mund të bëjë të mundur ndryshimin e një plani urbanistik dhe sot ju keni parë se si plani urbanistik i qytetit të Tiranës, i hartuar në kohën kur unë isha kryetar bashkie dhe i miratuar në vitin 2013 është ndryshuar nga Erion Veliaj dhe është miratuar nga Edi Rama”, tha Basha.
