Asistenca do të jetë për hetimin e ngjarjeve kriminale në fushën e vendosjes së eksplozivëve
Ekspertë të EULEX do të vijnë në Tiranë për të asistuar policinë shqiptare në hetimine krimeve me eksploziv. Zëvendësshefi i Sektorit Ekzekutiv të Policisë, Misioni EULEX, Kosovë, Oliver Hoffman, u takua sot në Tiranë, me Drejtorin e Policisë së Shtetit, Haki Çako. Në takim me Çakon, Hoffman tha: “Për këtë prioritet do të dërgojmë ekspertë që do të ndihmojnë në hetimin e ngjarjeve kriminale në fushën e vendosjes së eksplozivëve”, tha Hoffman.
Ai theksoi gjithashtu edhe gatishmërinë e Misionit EULEX në drejtim të shkëmbimit të informacioneve të rëndësishme për hetimin e veprave të ndryshme kriminale të kryera nga grupe që mund të veprojnë në të dy vendet, si dhe krijimin e lehtësirave për organizimin e takimeve rajonale me Shefat e Policive të vendeve të rajonit me qëllim koordinimin e veprimeve të luftës ndaj krimit.
Drejtori i Policisë së Shtetit, Drejtues Madhor Haki Çako vlerësoi ndihmën e ofruar nga Hoffman, duke theksuar rëndësinë e takimeve të tilla si dhe e siguroi se Policia e Shtetit do të jetë një nga partnerët kryesorë në luftën ndaj krimit. Po kështu, do të jetë e hapur ndaj çdo lloj bashkëpunimi me qëllim rritjen e sigurisë në rajon. “Lufta kundër terrorizmit është prioritet dhe bashkëpunimi me partnerët është i domosdoshëm” ,nënvizoi Çako ndër të tjera.
Ky takim ishte në vazhdën e takimeve të kryera nga Hoffman me Drejtues të Policive të rajonit, me qëllim vendosjen e kontakteve dhe rritjen e bashkëpunimit. Gjatë këtij takimi, nga të dyja palët u theksua bashkëpunimi i deritanishëm në luftën ndaj krimit të organizuar, terrorizmit e radikalizmit, kontrollit të kufijve si dhe në drejtim të shkëmbimit të informacioneve apo hetimeve të përbashkëta.
