Ndërkohë që banorët e Astrit po protestojnë para bashkisë së Tiranës për pronat e tyre pasi do të shemben në kuadër të projektit për Unazën e Madhe të Tiranës, bëhet e ditur se punonjësit e ARRSH-së kanë vijuar punimet në zonën e Astirit.
Fax News raporton se në zonën e Unazës së Re ka nisur prerja e pëmëve, pikërisht në zonën ku do të shemben mbi 300 banesa të banorëve të cilët po protestojnë prej ditësh.
Ndërkohë më herët Ministri i Infrastrukturës dhe Industrisë Damian Gjiknuri ka reaguar lidhur me protestat e vazhdueshme të qytetarëve të Astirit kundër prishjes së banesave të tyre, në kuadër të projektit të Unazës së Madhe.
Gjiknuri thotë se banorët me dokumentacione do të shpronësohen në vlerën 100%, ndërsa ata që kanë pasur pa leje shtëpitë e tyre, do të marrin qera për tre vite dhe do të trajtohen me prioritet për banesa sociale.
“Segmenti i përfunduar urban i Unazës së Madhe nga Komuna e Parisit tek Shkolla Teknologjike është modeli ynë për Tiranën e së ardhmes. Për çdo skeptik, ky është standardi me të cilin do ndërtohet dhe segmenti nga Shkolla Teknologjike tek Sheshi Shqiponja.
Pronarët shpronësohen 100%. Ata pa leje do marrin 3 vite qira dhe do trajtohen me përparësi për banesa sociale.” shkruan Gjiknuri.
