Në listën e fundit të Christian Panucci, binte në sy emri i Ardian Ismajli, kapitenit të Shpresave të Kosovës, i cili tashmë do të jetë pjesë e Shqipërisë.
Në një intervistë për mediat kroate pas ftesës, ai ka dhënë arsyet se pse zgjodhi të përfaqësojë Shqipërinë në të ardhmen.
“Ne jemi një komb, shpresoj që së shpejti të bashkohemi në një shtet, por kemi ekipe të ndryshme. Shqipëria është më e mirë dhe më ofron mua më shumë mundësi për t’u promovuar. Veç të tjerave, unë kam luajtur për Kosovën U21… Ky ishte motivi kryesor për vendimin e marrë, që kishte edhe mbështetjen e prindërve të mi. Disa gazetarë dhe tifozë më kritikojnë mua, duke pretenduar se nuk do të ketë vend për mua te kombëtarja shqiptare për shkak se nuk kam luajtur shumë te Hajduku. Por unë jam i bindur dhe i sigurt për vendimin që kam marrë. Unë jam gati që të luaj që kundër Skocisë në Nations League”.
