Ndërtimi i tubacionit planifikohet të nisë në mes të vitit
Më 17 maj, në Selanik do të zhvillohet ceremonia e nisjes së punimeve të ndërtimit të Gazsjellësit Trans Adriatik, TAP. Lajmin e ka bërë të ditur për mediat greke ministri i Energjisë, Panos Skourletis.
Në këtë ceremoni që do të organizohet nga TAP, planifikohet që të marrin pjesë një numër i madh zyrtarësh të lartë nga disa vende.
Projekti që parashikon transportimin e gazit të Azerbajxhanit në Europë, është projekti më i rëndësishëm i gazit në Europë. Tubacioni 870 kilometra do të jetë i lidhur me Gazsjellësin Trans Anatolian (TANAP) në kufirin turko-grek, duke kaluar përmes Greqisë, Shqipërisë dhe Detit Adriatik dhe më pas në brigjet e bregut jugor të Italisë.
