Analiza 6-mujore për krimin ekonomik: U sekuestruan 45 milionë euro pasuri të luajtshme e të paluajtshme
Nga muaji qershor deri në dhjetor 2015, i janë shkaktuar buxhetit të shtetit 60 milion euro dëm, si pasojë e skemave mashtruese. Prokuroria e Përgjithshme përfundoi analizën e gjashtë mujorit të dytë të vitit 2015, duke nxjerrë rezultatet në luftën kundër krimit ekonomik.
Në bilancin e prokurorisë, konsiderohet sukses sekuestrimi i pasurive të paluajtshme e të luajtshme në vlerë rreth 45 milionë euro. Prokuroria ka përfunduar hetimet dhe ka evidentuar personat përgjegjës në disa skema mashtruese financiare në tregun e karburanteve, farmaceutik, konçensione, ndërtim, etj.
Në përfundim të hetimeve për rreth 20 çështje ku është konstatuar krim ekonomik, prokuroria ka çuar për ndjekje penale rreth 30 persona. Ndër këto çështje përfshihet edhe ajo e skemës mashtruese me rimbursimin e fondit të ilaçeve, në vlerë rreth 2 milionë euro. Në skemat mashtruese janë implikuar zyrtarë të lartë të disa digastereve të shtetit, siç është drejtoria e tatim-taksave apo edhe drejtues të Shëndetit Publik por edhe të institucioneve të tjera të cilat menaxhojnë fushën e karburanteve e konçesioneve.
