Pesë ministrat e BDI-së në qeverinë maqedonase kanë dorëzuar sot zyrtarish dorëheqjen. Vendimi ishte marrë një natë më parë nga forumet drejtuese të kësaj partie. Sipas mediave maqedonase, publikimi i audiopërgjimit të deputetes Ermira Mehmeti dhe zv.kryeministrit Musa Xhaferri ka qenë aryeja kryesore që sipas BDI vjen nga rryma anti-shqiptare.
“Që nga nisja e zbulimit të përgjimeve joligjore nga opozita maqedonase, Bashkimi Demokratik për Integrim ka kërkuar që të botohet çdo bisedë autentike joligjore që ka të bëjë me krim dhe keqpërdorim të detyrës, por në mungesë të materialeve të tilla të cilat denoncojnë korrupsion ose krim nga ana e anëtarëve të BDI, qendrat që e luftojnë BDI-në qysh nga viti 2002 po prodhojnë montime dhe fabrikime të përgjimeve të cilat janë absolutisht të papranueshme dhe paraqesin metodën më të ulët dhe jonjerëzore të sulmeve politike dhe personale. Qarqe të caktuara prodhojnë falsifikate të njëpasnjëshme, duke përfshirë dosje të fabrikuara, afera korruptive të paqena, dhe biseda të montuara si mjet i fundit për ta luftuar besimin e palëkundur të shqiptarëve ndaj BDI-së dhe për ta dobësuar faktorin politik shqiptar në Maqedoni.
Bashkimi Demokratik për Integrim mbrëmë demonstroi unitet absolut të radhëve të veta si dhe mobilizim maksimal për ta luftuar të keqën që po i gatuhet shqiptarëve nga qendra që nuk ia duan të mirën as shqiptarëve, as vendit, e as rajonit” ”- thuhet në deklaratë.
