77- vjeçari Haxhi Lika, i cili mbeti i plagosur gjatë një aksioni të forcave RENEA në Divjakë në fshatin Rremas në një intervistë për Fax News tregon si ndodhi ngjarja.
“U ngrita herët në mëngjes për të përgatitur ushqimin e lopëve. Ne ishim brenda në dhomë, u ngritëm. Erdhi policia, dola në dritare për të parë se çfarë do të ndodhte dhe aty thirrën polcia. Dola në dritare ngrita grilat dhe aty më qëlluan. Më qëlloi policia. Nuk është e vërtetë që kam dalë me çifte.”
Lika, i cili tashmë ndodhet në spitalin e Traumës në Tiranë, u shpreh për Fax News se nuk ka lidhje me personat që kërkohen policia dhe se nuk i njeh fare.
“Më çuan në Lushnje ku mora mjekimin dhe më pas në Tiranë. Në Lushnje me bënë dhe skaner.Unë nuk kam strehuar persona të dyshuar në banesë. Unë nuk i njoh personat që kërkon policia.”
Ndërkohë edhe më herët familjarët e 77-vjeçarit akuzuan policinë se i kishte tmerruar ata gjatë natës e për më tepër kishin qëlluar me armë zjarri, duke sjellë pasojë plagosjen e 77-vjeçarit Haxhi Lika.
Ndërkohë policia në njoftimin e saj shkruante se i plagosuri nuk i është bindur urdhërit të policisë.
“Forcat speciale RENEA, rreth orës 05:30, kanë ushtruar disa kontrolle banesash në fshatin Remas të Lushnjës. Ndër to edhe banesën e shtetasit H.L., 77 vjeç, pasi disponohej informacion se në këtë banesë strehoheshin dy shtetas të dyshuar si autorë vrasjesh. Në momentin që është bërë rrethimi i banesës, konform gjithë procedurave standarde të ndërhyrjes, shtetasi H.L. nuk i është përgjigjur thirrjes së Policisë, por ka dalë në dritare me një armë në dorë (rezultoi armë gjahu).
Ndodhur në këto kushte, Policia ka qëlluar në ajër, duke i bërë thirrje për të dalë nga banesa. Në rrethana ende të paqarta, shtetasi H.L. është dëmtuar në kokë dhe ndodhet në spital jashtë rrezikut për jetën. Eksperti mjeko-ligjor po punon për përcaktimin e shkakut të dëmtimit dhe rrethanat”, thuhej në njoftimin e Policisë së Shtetit.
