Në vendin tim… në vendin tënd…
Nga Mesila Doda
Pak e nga pak po i bishtnojmë të gjithë të keqes individualisht. Shkollat që mbyllen janë shenja të kobshme të vendit që zbraset nga e keqja që i ka zënë derën.
Përballë saj po mendojme secili individualisht zgjidhjen, të ikim e t’i lëmë rrugën të lirë krimit, trafikut, arrogancës, varfërisë e hipokrizisë.
Të gjithë kemi faj, e kjo është situata e pikës pa kthim. Shkollat që mbyllen nuk janë këmbanë alarmi, janë shenja e kobit që ka trokitur e është futur dhunshëm në shtëpitë tona.
16 shkolla që mbyllen në Fier, 9 në Vlorë, 8 shkolla në Lezhë janë vetëm informacionet e para të katastrofës.
Sipas Institutit të Statistikave, në vendin tonë:
– nga arsimi 9 vjeçar, janë larguar 57 403 nxënës.
– nga arsimi mesëm janë larguar 31 875 nxënës.
– nga arsimi i lartë janë larguar 44 425 studentë.
Në krahasim me vitin 2013 e deri më sot, rreth 133 mijë nxënës ose 1 në 6 nxënës kanë braktisur shkollat!
Në këto kushte është betejë përballje, e nuk është më përballje politike, po beteja mes të mirës dhe të keqes. Mbetet në dorën tonë të vendosim nga cila anë jemi.
Unë jam nga ana e fëmijëve që sot mungojnë në ato banka shkollash. Çdo gjë tjetër sot më bëhet e parëndësishme!!!
