Do të marrë pjesë në takimin e ministrave të Jashtëm të Ballkanit Perendimor i cili zhvillohet në Durrës më 30-31 mars
Ministrat e Jashtëm të vendeve të Ballkanit Perëndimor vijnë në Shqipëri për ministerialin e rradhës, ku do të jetë i pranishëm edhe Komisioneri i BE-së për zgjerimin Johanes Hahn. Ministria e Jashtme njofton se ministerial do të mbahet në Durrës në datat 30-31 mars.
“Në vijim të Samitit të Ballkanit Perëndimor të mbajtur në Vjenë, më datë 27 gusht 2015, dhe në përgatitje të Samitit që do të mbahet në Paris në korrik 2016, Ministria e Punëve të Jashtme organizon në Durrës, më 30-31 mars 2016, takimin e Ministrave të Punëve të Jashtme të vendeve të Ballkanit Perëndimor, me praninë e Komisionerit të BE-së për Politikën Evropiane të Fqinjësisë dhe Negociatat e Zgjerimit, z. Hahn, Sekretarit të Përgjithshëm të RÇ, z. Svilanovic, Ministrit të Punëve të Jashtme të Republikës Çeke, z. Lubomir Zaoralek në kapacitetin e tij si kryesues i rradhës i Grupit të Vishegradit (V4) si dhe Sekretarit të Shtetit, z. Harlem Desir dhe Nën-sekretarit italian për Punët e Jashtme Vincenzo Amendola si të ftuar nderi”, thuhet në njoftimin e Ministrisë së Jashtme.
Ky Ministerial do të jetë një mundësi për pjesëmarrësit për të vlerësuar dhe thelluar më tej punën e bërë lidhur me përgatitjen e projekteve rajonale të ndërlidhjes në fushën e transportit dhe energjisë, në kuadër të përgatitjeve për Samitin për Ballkanin Perëndimor që do të mbahet në Paris në muajin korrik të këtij viti.
