Mbyllet në barazim 2-2 sfida mes Barcelonës dhe Real Madrid në “Camp Nou”. Barcelona kaloi në avantazh me një kundërsulm perfekt, të nisur dhe të finalizuar nga Luis Suarez me ndihmën e Sergio Ramos. Vetëm katër minuta më vonë, Cristiano Ronaldo barazoi për Real Madrid.
Ky ishte goli numër 400 për Real Madrid, në të gjitha ndeshjet “El Clasico”, në të gjitha veprimtaritë. I 18-i për Ronaldo në ndeshjet kundër Barcelonës, që në këtë mënyrë barazoi rekordin e Alfredo Di Stefano.
Në minutën e fundit të pjesës së parë, Barcelona mbeti me dhjetë futbollistë, pas kartonit të kuq të marrë nga Roberto, i cili goditi me grusht Marcelo. Edhe pse me një lojtar më pak në fushë, Barcelona e shënoi golin e dytë, në minutën e shtatë të këtij fraksioni, kur Lionel Messi, i shërbyer nga Luis Suarez mposhti portierin Keylor Navas.
Pas një ore lojë, Andres Iniesta u zëvendësua me Paulinho duke i dhënë fund “klasikes” numër 38 dhe të fundit në karrierën e tij. Në minutën e 72-të, Gareth Bale shënoi një gol fantastik duke vënë baraspeshën në “Camp Nou”.
