Afganistan, komuniteti ndërkombëtar dënon sulmet kundër gazetarëve

Komuniteti ndërkombëtar dënoi ashpër sulmet kundër gazetarëve në Afganistan, sipas OKB-së.

Të paktën 37 persona, mes të cilëve një fotograf i AFP-së dhe nëntë gazetarë të tjerë, kanë humbur jetën në Afganistan pas një sërë atentatesh të përgjakshme në Kabul dhe në jug.

Një atentat i dyfishtë kamikaz, marrë përsipër nga grupi xhihadist i Shtetit Islamik goditi dje kryeqytetin duke shkaktuar të paktën 25 të vdekur, mes të cilëve dhe kryefotoreporteri i AFP-së në Kabul, Shah Marai, 41 vjeç.

Tetë gazetarë të tjerë janë vrarë gjithashtu në momentin e shpërthimit të dytë të ndodhur mes reporterëve.

Sekretari i përgjithshëm i Kombeve të Bashkuara, Antonio Guterres shprehu indinjatën e tij pas atentatit të dyfishtë, që shkaktoi gjithashtu edhe 49 të plagosur.