Në Kuvend po zhvillohet një forum për personat LGBTI ku marrin pjesë deputetë të opozitës e mazhorancës, ambasadori amerikan Donald Lu dhe Romana Vlahutin.
Lu tha se ka pak politikanë shqiptarë që mbështesin në publik LGBTI, ndërsa rrëfeu se si disa vite më parë një djalë katër vjeçar që po kalonte me babain e tij gjatë parakalimit me biçikleta të këtij komuniteti, desh u godit nga një vezë.
“Gjatë paradës së LGBTI disa vite më parë një djalë katër vjeçar që po kalonte me babain e tij desh u godit nga një vezë. Një nga koleget e mia të ambasadës u godit me një domate, më thanë se kjo ishte shumë më mirë në krahasim me të kaluarën. Është e vërtetë se kam parë përmirësim në Tiranë, por kam parë edhe homofobi të vazhdueshme. Kam parë fare pak politikanë shqiptarë që të shfaqin mbështetjen në publik në nisma si parada apo Indeksi i LGBTI”, tha Lu.
Ambasadori gjithashtu këshilloi disa deputetë të cilët kanë dalë hapur kundër këtij komuniteti të kenë kujdes.
“Kemi ndjekur Ylli Manjanin, Tritan Shehun dhe Oriola Pampurin. Kini kujdes sepse përfaqësoni edhe elektoratin tuaj. Kemi ndjekur debtatet e nxitura nga deklaratat e bëra, shpresoj që drejtuesit politikë ta kuptojnë se fjalët e tyre nuk përfaqësojnë vetëm bindjet e tyre partiake, por edhe të njerëzve që i kanë zgjedhur për ta përfaqësuar”, theksoi ai.
