Dervishi: Nëse shkelin kontratën u hiqet licenca
Qeveria shqiptare duket që e ka vendosur që sektorin strategjik të naftës t’ua lërë kinezëve. Autoritetet shqiptare nuk kanë patur asnjë objeksion për shitjen e aksioneve të Bankers Petroleum nëpërmjet bursës tek kompania kineze, Geo-Jade Petroleum Corporation. Dael Dervishi, Drejtor i përgjithshëm i AKBN, ka deklaruar për mediat se shitja nuk ka nevojë për një miratim të qeverisë shqiptare. Koncesionarët e naftës kanë të drejtë të njoftojnë qeverinë shqiptare paraprakisht për shitjen e aksioneve dhe në rastin e Bankers njoftimi është bërë dje. “Ne do të monitorojmë kontratën pikë për pikë detyrimet aktuale që rrjedhin nga marrëveshja koncesionare me Bankers pavarësisht blerësit tha Dervishi”. Nëse kontrata nuk zbatohet sipas përcaktimeve ligjore qeveria shqiptare dhe përkatësisht AKBN propozon heqjen e licencës, ka deklaruar ai.
Por në rastin e këtij transaksioni ai tha se aksionet kane kaluar tek një kompani shumë e më e fuqishme se Bankersi, e aftë për të përballuar investimet e reja në kushtet e çmimeve tepër të ulta në Shqipëri. Dervishi tha se një çmim në bursa më pak se 40 dollarë i nxjerr me humbje koncesionarët e nxjerrjes së naftës. Për këtë arsye kompanitë janë vënë në vështirësi dhe nuk po përballojnë humbjet pasi në Shqipëri kostot e nxjerrjes së naftës janë shumë më të mëdha se në vendet e tjera naftëmbajtëse.
Një ditë më parë kompania Bankers Petroleum që shfrytëzon me koncesion fushën naftëmbajtëse të Patos Marinzës ka bërë të ditur dje zyrtarisht shitjen për 407 milion dollarë amerikanë tek kompania kineze Geo-Jade Petroleum Corporation. Marrëveshja ka marrë miratimin unanim të Bordit të Drejtorëve të Bankers dhe të stafit menaxhues.
