Beqir Nuredini, kryetar i Bashkisë së Rrogozhinës në një komunikim në faqen e tij zyrtare shprehet i hapur për hetime, megjithëse është distancuar nga çdo akuzë, pasi hetimet e kanë njohur me disa dokumente të fallsifikuara.
Më poshtë botojmë të plotë reagimin e kryetarit të Bashkisë së Rrogozhinës.
Duke marrë shkas nga çështjet e ngritura nga Prokuroria, si kryetar i Bashkisë Rrogozhinë, mbështes hetimet dhe vënien para përgjegjësisë të autorëve. Unë, si kryetar Bashkie Rrogozhinë, kam zbatur procedurën që parashikon ligji për përcelljen e praktikave për regjistrim fillestar të pronave, të aplikuara nga banorët e zonës. Distancohem nga çdo akuzë që është bërë.
Nga hetimet e Prokurorisë jam njohur me disa dokumenta, të cilat ishin të fallsifikuara. Për këto fallsifikime unë kam bërë denoncim në organet përkatëse.
Masa “detyrim paraqitje”, e caktuar nga gjykata, për mua ishte e papritur. Kjo, për shkak se unë kam qënë gjithmonë i gatshëm gjatë hetimeve dhe kam vënë në dispozicion të Prokurorisë çdo dokument dhe dëshmi që më është kërkuar. Gjithsesi, mbetem i hapur për çdo hetim.
Falë ndërhyrjeve të bëra nga Bashkia Rrogozhinë, Plazhi i Spillesë është kthyer në një ndër destinacionet më të rëndësishme turistike në vend. Kjo vërtetohet edhe nga frekuentimi që është bërë nga qytetarët përgjatë 2017-së. Nga një rrënojë, Plazhi i Spillesë është kthyer ndër plazhet më të kërkuara nga shqiptarë dhe të huaj. Janë më shumë se 20 mijë pushues në vit, që frekuentojnë Plazhin e Spillesë, falë këtyre ndërhyrjeve të bëra në 2 vitet e fundit.
