Një emocion që është lëkundur në dy skaje të kundërta ka qenë eksperienca e këtij viti e këngëtarit shqiptar Ermal Meta në Sanremo.
Sapo kënga e Metës në bashkëpunim me Fabrizio Moron u bë publike, pati pëlqime të shumta, megjithatë “shkëlqimi” u zbeh pak pas akuzave për plagjiaturë.
Adhuruesit që u afeksionuam menjëherë me tekstin dhe tingujt e këngës që mbart mesazhe dhe dhimbje për një botë që kërkon ta arrijë paqen me luftë, s’i braktisën për asnjë moment këngëtarët.
Kënga po dëgjohej masivisht dhe pëlqimi për të shtohej bashkë me presionin e mundësisë së pezullimit nga festiali. Por dyshja Meta-Moro e kaluan këtë sfidë për të qenë më të fortë.
Vetëm pak orë para natës finale të Sanremos, që do të mbahet sonte “Non mi avete fatto niente” e Metës dhe Moros, sipas një klasifikimi provizor renditet e para.
Ndoshta në këtë rast është me vend të thuhet: “Çfarë nuk të vret, të bën më të fortë”. I urojmë Ermal Metës të jetë fituesi, megjithatë tashmë kjo këngë ka rrëmbyer zemrat e publikut.
