Saimir Ahmeti, i cili u arratis nga tualeti i gjykatës pak momente para se të njihej me vendimin, u vu në prangat e policisë pas një kërkimi prej dy orësh.
Blutë e Gjirokastrës e zbuluan, teksa ishte fshehur në një pusetë. Ngjarja ndodhi rreth orës 12:00 në Gjykatën e Apelit Gjirokastrës kur Saimir Ahmeti i akuzuar për “përndjekje” është larguar me shpejtësi në momentin, kur njëri prej efektivëve të policisë që e shoqëronte për në sallën e gjyqit ka tentuar ta prangosë.
Ai akuzohej për përndjekje dhe kërcënimin e bashkëjetueses së tij, Bleona Habibi, 18 vjeç.
Familja e vajzës nuk ka qënë dakord me lidhjen, ndonëse kjo e fundit prej 8 muajsh jetonte në shtëpinë e Saimirit.
Familjarët e djalit thonë se nuk dinë që i biri ta ketë dhunuar e kërcënuar ndonjëherë dhe se pretendimet e ngritura nga familja e vajzës janë të padrejta.
Por, ndërsa gjykata priste të ballafaqonte palët, i riu ka zgjedhur të arratiset.
Më herët familjarët e të rinjve kanë replikuar jashtë sallës së gjyqit. Madje, Zhaneta, nëna e vajzës i ka kërkuar Pranverës, nënës së djalit, se do të tërhiqeshin nga akuzat për djalin, vetëm nëse ai do ta linte vajzën e tyre të qetë.
Për Thoma dhe Pranvera Ahmeti, babai dhe nëna e 24- vjeçarit, Saimir Ahmeti, Bleona e do djalin e tyre. Dy të rinjtë janë martuar me dashuri madje familja Ahmeti ka bërë edhe dasmë për djalin e tyre të vetëm.
http://www.balkanweb.com/site/u-arratis-nga-tualeti-i-gjykates-se-gjirokastres-kapet-24-vjecari/
