Kryeministri rama e ka falenderuar parardhësine tij në krye të PS-së, madje e ka ftuar ti bashkohet festës së 25 vjetorit, pasi ato që i ndajnë janë më pak të rëndësishme se ato që i bashkojnë.
“Një falenderim për paraardhësin tim, liderin e parë të kësaj partie, Fatos Nano. Dëshiroj të na bashkohet në 25-vjetorin e kësaj partie dhe të gjejë deri atë ditë fjalët e duhura për kontributin e tij në forcimin e karakterit demokratik të PS. Çfarë na ka ndarë me të, nuk e ndan në dysh historinë e kësaj partie dhe nuk e bën më pak të rëndësishëm Fatos Nanon me dritëhijet e tij,” tha sot Rama.
Po cili ishte qëndrimi i tij 11 vite më parë, kur mori postin e Kryetarit të PS-së.
Edi Rama 9 tetor 2005, kongresi i PS
Të dashur bashkëqytetarë, na falni! Na falni për modelin me të cilin ju qeverisëm, duke e kthyer arrogancën në stil komunikimi, cinizmin në vijë të sjelljes politike, indiferencën ndaj qytetarit të thjeshtë në mënyrë të të jetuari të qenies sonë në pushtet.
Na falni për varfërinë, që e luftuam kryesisht me llafe e me strategjira që as vetë nuk i lexuam, duke e transformuar këtë kauzë të madhe ekzistenciale të së majtës në një shtojcë të rëndomtë të fjalimeve tona demagogjike, ndërkohë që në terrenin e jetës së përditshme, aty ku varfëria shtrinte tentakulat e saj mbi zona të tëra të Shqipërisë, ne munguam. Na falni për polarizimin galopant të shoqërisë e për shtetin social që e kthyem në një farsë, për papunësinë që e pranuam pasivisht si një bashkudhëtar të paprekshëm në rrugën tonë drejt progresit dhe për dembelizmin e parazitizmin që ushqyem me politikat tona sociale pothuajse fiktive. Na falni për armiqësinë me të cilën e trajtuam rëndom sipërmarrjen e lirë shqiptare, duke e ndrydhur me qëndrime arbitrare të kthyera dalëngadalë në sistem, dhe duke e sulmuar me hordhi taksidarësh të paudhë, të cilët u mësuan të trokisnin dyerve të biznesmenëve të mëdhenj e të vegjël me dy thasë në krahë, një për shtetin e një për pushtetin. 
Na falni njëqind herë për nivelin e korrupsionit shtetëror, e mbi të gjitha, për përpjekjet krejt të pamjaftueshme që qeveria jonë bëri sidomos në dy vitet e fundit kundër kësaj kryefjale të luftës së të gjithë kundërshtarëve ndaj nesh, të cilët i ndihmuam bashkë me vetë korrupsionin, duke krijuar një mjedis të ndyrë, asfiksues e dëshpërues, akuzash e shantazhesh brenda nesh, për llogari të ambicieve e të delireve të shfrenuara personale për pushtet, të cilat e katandisën disa herë rresht PS-në në skenën e estradës më vulgare që shqiptarëve u ka rënë rasti të shohin.
