Është ndarë nga jeta para kohe zyrtarja e lartë e Lëvizjes Socialiste për Integrim, Luzhiana Abazi.
Abazi është një nga emrat e spikatur të kësaj force politike, ndërsa së fundmi ka pasur detyrën e drejtores së shërbimit spitalor.
Ajo prej kohesh vuante nga një sëmundje e rëndë që ia ndërpreu jetën në moshë të re.
Lajmi i trishtë është konfirmuar nga një tjetër aktiviste e këshilltare e LSI-së, Elona Guri, si dhe deputetja Nora Malaj në rrjetet sociale.
“Luzhiana o ëngjëll i bukur, unë besoja që ti do ia dilje, se ishe e fortë! Ty të donte Zoti pranë vetes, se ishe shumë e veçantë dhe më e mira për gjithe ne!
Je bërë kaq e bukur dhe dukesh kaq e qetë tani pas atyre dhimbjeve të tmerrshme që përjetove! Të dua shumë o Lala jonë! Do të mbajë gjithmonë në zemër me buzëqeshjen dhe mirësinë tënde. Shërbe ashtu siç di vetëm ti, me energjitë e tua në parajsë o Ëngjëll!!!”, shkruan Guri.
Abazi njihet si aktiviste e LSI-së dhe njëherësh një mjeke e njohur në kryeqytet, ndërsa më herët ka qenë kryetare në një nga minibashkitë e Tiranës.
Po ashtu për pesë vite me radhë Abazi ka qenë pedagoge në Fakultetin e Mjekësisë, si dhe pjesë e Kryesisë së LSI-së.
Kush ishte Luzhiana Abazi
Luzhiana Abazi lindi ne qytetin e Durrësit, më 19 Maj 1971.
Në vitin 1994, u diplomua në Fakultetin e Mjekësisë, Universiteti i Tiranës.
Abazi ka kryer një sërë specializimesh dhe trajnimesh.
Gjatë periudhës 1996-1998, ajo ka kryer një specializim për mjekun e familjes . Me 1999-2000 përfundoi me sukses Master-in për “Menaxhimin e shërbimit shëndetësor parësor”, Instituti superior “Della Sanita” në Romë.
Në periudhen 2000-2002 ka qenë drejtore pranë Autoritetit Shëndetësor Rajonal.
Abazi ka qenë pedagoge në Fakultetin e Mjekësisë për rreth 5-vjet, në vitet 2002 -2007.
Në periudhën 2007-2011 është zgjedhur kryetare e njësisë bashkiake nr.6 në Tiranë.
Në 2011-2013 ka qenë drejtore e “Drejtorisë nr. 2 të Punëtorëve të Qytetit’, Bashkia Tiranë.
Nga 2014-2016 zonja Abazi ka ushtruar detyrën si drejtore e Shërbimit Spitalor pranë Fondit të Sigurimit të Detyrueshëm të Kujdesit Shëndetësor (FSDKSH)
Nga 2016 e në vazhdim ishte drejtore e “Drejtorisë Rajonale të Fondit Tiranë”.
Abazi është dalluar për angazhimin e spikatur në politikë. Nga viti 2012 e në vazhdim ajo ishte anëtare e Kryesisë së Lëvizjes Socialiste për Integrim.
