Thaçi flet për vizitën e Vuçiçit: Së shpejti do ta vazhdojmë dialogun me Serbinë

Presidenti i Kosovës, Hashim Thaçi ka komentuar vizitën e presidentit serb në Kosovë.

Përmes një statusi në Facebook, Thaçi shpreh kënaqësinë që ajo u mbyll pa asnjë incident dhe se homologu i tij nga Serbia ka theksuar disa herë rëndësinë e dialogut, si rrugën e vetme për normalizim dhe pajtim.

“Duke përjashtuar disa nga deklaratat populiste, të cilat janë pothuajse të pashmangshme në vizita të tilla, vizita e homologut nga Serbia u përmbyll pa asnjë incident. Duke u bazuar në këto parime, Republika e Kosovës do të vazhdojë me përkushtim dialogun për normalizimin e marrëdhënieve ndërshtetërore, deri në arritjen e marrëveshjes historike për paqen dhe pajtimin.

Më vjen mirë që edhe homologu nga Serbia, gjatë qëndrimit në Kosovë, ka theksuar disa herë rëndësinë e dialogut, si rrugën e vetme për normalizim dhe pajtim. Prandaj, unë besoj që shumë shpejt do të vazhdojmë dialogun ndërshtetëror në nivelin më të lartë politik, të ndërmjetësuar nga BE-ja dhe të përkrahur fuqishëm nga SHBA-ja”, ka thënë Thaçi përmes një postimi në Facebook.