Bernard Fitoussi: Shteti francez ka angazhuar dhjetëra policë e hetues për zbardhjen e krimeve të Konjarit duke shpenzuar miliona euro, drejtësia shqiptare e liroi
U shpenzuan miliona euro nga shteti franzez për të arrestuar shqiptarin Domart Konjari por drejtësia shqiptare e ka liruar atë pak ditë më parë. Ambasadori francez në Shqipëri ka reaguar për këtë ngjarje duke e quajtur turp për Shqipërinë vendimin për lirimin e të arrestuarit, Konjari. Diplomati francez në Tiranë, Bernard Fitoussi, ka shkruar një letër autoriteteve shqiptare ku kujton akuzat e rënda për Konjarin dhe thekson se shteti francez ka angazhuar dhjetëra policë e hetues për zbardhjen e krimeve të Konjarit duke shpenzuar miliona euro.
“I ftuar i një vendi mik dhe aleat, nuk më takon të kritikoj vendimin e një trupi gjykues të pavarur. Dua veçanërisht të tërheq vëmendjen tuaj mbi interpretimin që mund t’i bëhet vendimit të Gjykatës së Apelit të Krimeve të Rënda të datës 14 mars 2016, për heqjen e masës së arrestit me burg ndaj D.K (Domart Konjari)”, thekson ambasadori në letër.
Në letrën e diplomatit theksohet se personi i liruar është dënuar në mungesë, më 13 nëntor 2015, nga Gjykata e Shkallës së Parë e Rennes (Francë) me 10 vjet burg. Nga ky dënim, sipas ambasadorit, ai nuk mund të bëjë më pak se gjashtë vite burg, me ndalim të përhershëm në territorin francez, dhe me një gjobë prej 2.6 milionë eurosh.
“Motivet janë: import, mbajtje, transport, tregtim i drogës, krijim i një grupi kriminal dhe pastrim parash nga trafiku i drogës. Ai është i njohur si drejtues i një rrjeti ndërkombëtar trafiku kokaine, aktiv në më shumë se gjashtë vende, rrjet ku janë të përfshirë dyzet e pesë persona nga pesë vende të ndryshme, mes të cilëve edhe francezë”, thuhet në letër.
Lirimi
Domart Konjari, i arrestuar në Korçë për dhënie ryshfeti ndaj një polici dhe përdorim pasaporte të falsifikuar, u lirua pak ditë më parë nga Gjykata e Apelit të Krimeve të Rënda pas një procedure të paqartë.
Vendimi për lirimin e tij ende nuk është zbardhur, ndërsa Prokuroria e ka kundërshtuar këtë vendim dhe ka hedhur poshtë akuzat e Gjykatës se dosja apo kërkesa për masë ishte dorëzuar jashtë afatit./ Panorama.al
