Gjykata e Krimeve të Rënda ka thërritur ish-ministrin e Brendshëm, Saimir Tahiri për ta njohur me vendimin për bllokimin e pasaportës.
Do të jetë një paraqitje jo në Prokurori, por në Gjykatën e Krimeve të Rënda. Report Tv ka mësuar se Tahiri është ftuar të paraqitet para gjyqtares Juliana Bako, dhe pritet që ish-ministri i Brendshëm të mbërrijë përpara Krimeve të Rënda të premten rreth orës 09:30, i shoqëruar nga avokati Maks Haxhia.
Pak ditë më parë gjykata bllokoi Tahirit pasaportën e daljen jashtë vëndit. Pas vendimit, Maks Haxhia, avokati i Tahiri dorëzoi pasaportën pranë Gjykatës së Krimeve. Pala mbrojtëse ka paralajmëruar ndërkohë ankimimin e vendimit të Gjykatës për të hequr masën e sigurisë për sekuestrimin e pasaportës dhe bllokimin për të dalë jashtë vendit.
