Përfundon 1-1, pra Partizani nuk arrin ta fitojë ndeshjen e madhe të së hënës, duke e shpërdoruar shansin e madh për të qenë vetëm një pikë larg Skënderbeut për pjesën e mbetur të edicionit. Raçiç i ka bërë të gjitha gjatë një 90 minutëshi, duke qenë fillimisht heroi dhe më pas personazhi negativ i të kuqve. Shenoi një gol, i ndihmuar edhe nga portjeri Shehi i kampionëve, hoqi bluzën për të festuar dhe mori një karton të verdhë, i treti për të dhe kështu do të humbasë ndeshjen e rradhës në transfertën e Durrësit, kur nuk dihet nëse Sukaj do të jetë i gatshëm. Dhe më pas humbet një 11 metërsh, mundësia më e mirë për të mbyllur takimin. Një Vila në formë të shkëlqyer, Toraso që gjithnjë edhe më shumë po bëhet lojtar nga më të rëndësishmit e Partizanit, si dhe Atanda që nuk i dha asnjë shans Xhejmsit, dukej se vendasit po i mbyllnin në favor të tyre llogaritë me Skënderbeun, madje në pjesën e dytë, megjithëse lëshuan terren dukej se e administronin avantazhin. Por ata që kishin përballë prandaj janë kampionë pesë herë rresht dhe që të pretendosh t’i mundësh duhet t’i shfrytëzosh të gjitha mundësitë. Goli i Vangjelit ishte vrasës dhe ndoshta ai që do t’i japë trofeun e gjashtë skuadrës së Josës.
