I pranishëm në eventin “Tirana Business Matching”, kryetari i Bashkisë së Tiranës, Erion Veliaj, tha se po punohet intensivisht për të bërë realitet zonën ekonomike të Tiranës, e cila do të lehtësojë edhe sipërmarrjen dhe gjenerojë vende të reja pune.
Veliaj tha se ndryshimi më i madh që ka ndodhur është se sot Bashkia e Tiranës i mendon dhe planifikon projektet e saj duke llogaritur impaktin e tyre ekonomik, sikurse është zona tek Bulevardi i Ri.
Kryebashkiaku theksoi se për herë të parë Tirana ka një hapësirë të pajisur jo vetëm me të gjithë infrastrukturën e nevojshme, por edhe me një plan të mirëfilltë zhvillimi, që do të kthehet në kantierin e madh të Tiranës së gjeneratës tjetër.
“Gjithmonë e më shumë qytetet po zënë peshë në axhendat ekonomike. Shumë shpejt do të aplikojmë për statusin e një zone të lirë ekonomike në zonën e Kasharit. E di që për shumë biznese që e kanë marrë vendimin për t’u transferuar në Shqipëri, sfida e zgjerimit dhe e negocimit të pronave dhe aseteve është një dhimbje koke. Besoj se me dispozitat ligjore që do ta lejojnë bashkinë të jetë një operator i zonave të lira ekonomike, do të jemi shumë shpejt në fazën e aplikimit”, tha Veliaj.
