Të njëjtën ditë që shefi i diplomacisë greke Nikos Kotzias u takua në Selanik me homologë nga rajoni, përfshirë dhe Ditmir Bushatin, zëvendësministri i jashtëm grek, ka raportuar në parlamentin e vendit të tij për një tjetër problem që Athina ka evidentuar në marrëdhëniet me Tiranën.
Sipas zëvendësministrit Janis Amanatidis kemi të bëjmë me një tjetër provokacion të palës shqiptare që lidhet me tekstet shkollore të historisë dhe gjeografisë.
Në Parlamentin grek është thënë se ka një problem shumë serioz, sepse tani, në fillim të vitit shkollor në Shqipëri, në tekstet e klasës së 9-të dhe të 12-të, vazhdohet të përfshihet një kapitull me titullin “Zona shqiptare në Greqi”, ku paraqiten si zona të Çamërisë nga ndarja e Epirit të Veriut Konica, Kosturi, gjithë Epiri, Preveza, Arta, Gumenica.
Për zëvendësministrin grek ky është një qëndrim i papranueshëm dhe fyes.
Në lidhje me këtë ka patur një reagim të fortë të sekretares së përgjithshme të PDIU-së, Mesila Doda që vë në dukje qëndrimin eunuk të Tiranës politike që është nënshtruar në të gjitha pikëpamjet nga fryma shoviniste e Greqisë fqinje.
Ja mesazhi i saj i plotë.
Ata nuk ndalen… i duan të gjitha… duan t’i ulin kokën politikës, të blejnë historinë, të rrëmbejnë shtëpitë, pronat, varret, të shesin për të tyret qytetet tona…
Këtyre kokoroçëve tanë, që trimëroheshin deri dje, kur kishin mburojë PDIU-në dhe zërin tonë, kur bënin si atdhetarë e ngrinin zërin për drejtësi për shqiptarët e Çamerisë, tani u ka ngelur veç të ulin kokën e të përshpërisin në heshtje: “Ne donim rilindjen urbane, të tjerat jua japim të gjitha… Çamërinë me gjithë sa ka, e kemi falur një herë… e falim sa herë ta doni e bashkë me të dhe historine e të gjallëve e të vdekurve tanë.”
Ata nuk do të ndalen kurrë… politikanët tanë nuk do trimërohen kurrë…
