Arrigo Saki vë re se së fundi edhe futbolli italian ka ndryshuar. Sipas tij, aktualisht ka një grup trajnerësh me ide inovatore. “Jam shumë i lumtur – thotë ish-kampioni i madh – që ka përfunduar një lloj diktature taktike, kur luhej gjithmonë në të njëtën mënyrë, duke menduar vazhdimisht të mos humbasësh dhe më së shumti të bazohesh te kundërsulmi. Sipas tij, fenomenët e rinj të pankinave janë Di Françesko, Spaleti, Sarri, Paulo Souza dhe Xhampaolo, por në vendin e parë të listës qëndron Konte, vetëm se duhet të zhvishet nga një lloj italianiteti i tepërt. Alegri? Sipas Sakit pozicionohet diku në mes. Eshtë i aftë taktikisht dhe di të ndryshojë sipas situatave, por i intereson vetëm të fitojë. Ndërsa filozofia e tij është: Të fitosh, të bindësh dhe të dëfrehesh. “Vetëm të fitosh mund të mjaftojë në Itali. Edhe Rozenborg fiton gjithmonë në Norvegji, ndërsa në Champion jo”, përfundon Saki.
