Një ish-komando amerikan, që shkroi një libër për vrasjen e Osama bin Laden, do t’i paguajë 7 milionë dollarë qeverisë së SHBA për shkelje të marrëveshjes së ruajtjes së sekretit.
Matt Bissonette nuk arriti të siguronte lejen e posaçme nga Pentagoni përpara se libri “No Easy Day” të publikohej në vitin 2012, nën pseudonimin Mark Owen.
Tani, ai ka rënë dakord për të paguar gjobën për rrëfimin që ka bërë në libër, për intervistat, si dhe për producentët e filmave. Në këmbim, qeveria amerikane do të shfuqizojë detyrimet e tjera të tij.
Në padinë e bërë në gjykatën e shtetit të Virxhinias, komandoja Matt Bissonette pranoi se nuk e kishte dhënë librin e tij për rishikim në Departamentin e Mbrojtjes para se të publikohej. Ai kërkoi falje duke thënë se kishte vepruar në bazë të një këshille të pasaktë të avokatit të tij.
