Konfederata e Sindikatave të Pavarura të Shqipërisë, ka reaguar lidhur me vdekjen e 66-vjecarit ditën e sotme në rrugën “5 Maji”.
Përmes një deklarate shpërndarë mediave, konfederata thotë se mungesa e kushteve teknike në punë ka shkaktuar tragjedinë e radhës.
“Mungesa e kushteve të sigurisë teknike në punë këtë të shtunë ka shkaktuar tragjedinë e radhës. Një punëtor ndërtimi 66 vjeçari me iniciale J.M është rrëzuar nga një lartësi e konsiderueshme dhe ka gjetur vdekjen në një objekt në rrugën 5 maji në Tiranë. Konfederata e Sindikatave të Shqipërise I shpreh ngushëllimet familjes viktimës dhe kërkon të zbardhen rrethanat e ngjarjes. Shkaktarët duhet të përfundojnë prapa hekurave. Inspektoriati i Punës është kthyer në mbledhës statistikash dhe ka humbur misionin parandalues. Më tragjik këtë ngjarje e bën fakti se ka pasur përpjekje për fshehjen e saj. Policia dhe prokuroria të prangosin pronarin e kantierit. Skllavërimi i punëtorëve minon procesin integrues.” thuhet në njoftimin e Konfederatës së sindikatave të Pavarura të Shqipërisë.
