Eurostat publikon raportin për azilkërkuesit, Shqipëria renditet pas Sirisë, Afganistanit dhe Irakut
Shqipëria ndodhet ende në listën e vendeve me numrin më të madh të azilkërkuesve në vendet e BE-së. 65395 shqiptarë kërkuan azil në vendet e Bashkimit Evropian vetëm për vitin 2015, sipas Eurostat në raportin e fundit të datës 4 mars për azilkërkuesit që janë regjistruar për herë të parë për azil në Bashkimin Europian.
Sipas këtij raporti vendet e para që kryesojnë listën e azilkërkuesve janë vendet e konfliktit si Siria, Afganistani dhe Iraku, e ndjekur më pas nga Kosova dhe Shqipëria.
Sipas raportit për shqiptarët Gjermania është vendi më i kërkuar për azil, me 53 805 kërkesa ose 12%.
Sipas Eurostat janë mbi 1.2 milionë persona kanë aplikuar për azil në vendet e Bashkimit Europian gjatë vitit 2015. Në raport theksohet gjtihashtu se rreth 1 milion aplikime të tjera janë në pritje. Kjo u referohet të gjithë atyre personave që kanë bërë aplikim dhe kërkesa e tyre është në shqyrtim. Në fund të 2015, janë ende duke u marrë në konsiderate nga autoritetet përgjegjëse vendase 922 800 aplikime për mbrojtje ndërkombëtare. Ndërsa në fund të 2014, ishin gati gjysma e tyre, 489 300.
