Pas arrestimit, zbardhet dëshmia e Arben Ferizit, personi i arrestuar nga policia për sasinë e kokainës që u kap mbrëmjen e të mërkurës në një kontejner me mish pule në Portin e Durrësit. Ferizi, 30 vjeç, banues në Prishtinë është administratori i firmës “Apetit Group” që kishte bërë porosinë e mishit të pulës.
“Kompania që administroj ka vite që merret me prodhimin e salçiçeve dhe është e suksesshme dhe nuk ka nevojë të implikohet në trafikimin e drogës. Ne si kompani nuk kemi asnjë lidhje dhe nuk kemi dijeni për praninë e lëndës narkotike në kontejner. Të gjitha veprimet kryhen online, porosia dhe blerja e mishit” – ka thënë administratori para hetuesve.
Ndërsa, agjenti doganor, Egert Vargu, ka thënë se nuk ka lidhje me drogën dhe se puna e tij është të bëjë procedura zhdoganimi dhe nuk merret me kontrollin e kontejnerëve.
Kujtojmë se pas hetimeve të thelluara nga Drejtoria Vendore e Policisë Durrës, në bashkëpunim me Drejtorinë Kundër Narkotikëve dhe Trafiqeve në Departamentin e Policisë Kriminale në Policinë e Shtetit dhe me Prokurorinë pranë Gjykatës së Rrethit Gjyqësor Durrës, vihen në pranga:
Arben Ferizi, me detyrë administrator i kompanisë
Egert Vargu, me detyrë agjent doganor në Portin e Durrësit.
Mbrëmjen e djeshme u bllokua një sasi prej 45.5 kg kokainë, e ndarë në 40 pako, e cila ndodhej në një kontejner ku ishin ngarkuar tonelata pulash. Ngarkesa, referuar raportimeve, kishte kaluar transit nga Brazili, ndërsa kontejneri kishte si destinacion final Maqedoninë e Veriut. Mësohet se ngarkesa me mish ishte porositur nga një firmë kosovare. Policia njoftoi se vijon puna hetimore për identifikimin dhe kapjen e personave të dyshuar që fshihen pas ngarkesës prej 45.5 kg kokainë.
Kjo është sasia e dytë e drogës që sekuestrohet nga Policia e Durrësit në port në harkun kohor të një muaji pasi më 17 Maj një tjetër ngarkesë prej 59 kg kokainë u kap në një konteiner me qymyr që vinte nga Ekuadori. Më parë janë raportuar raste të sekuestrimit të sasive të kokainës në kontenierët me banane. Ndoshta kapja e disa ngarkesave në portin e Durrësit pikërisht në këto kontenierë ka detyruar trafikantët që të tentojnë trafikimin e drogës edhe përmes ngarkesave të tjera, si në rastin e qymyrit, apo mishit të pulës.
Autoritetet shqiptare përgjithësisht nuk kanë mundur të zbulojnë rrjetin e porositësve të narkotikëve në Shqipëri, edhe pse ka pasur arrestime dhe dënime për administratorë kompanish, të cilët nuk kanë pranuar se kanë pasur dijeni për ngarkesat me drogë.
