Gjykata e Posaçme kundër Korrupsionit dhe Krimit të Organizuar ka nisur hetimet për Gjergj Cukalin të njohur ndryshe si “i forti i Myslym Shyrit”. Për hetim janë dërguar edhe dosjet e vëllezërve Enver dhe Edmond Jamaku të cilët së bashku me Cukalin akuzohen për pjesëmarrje në grupin kriminale.
Gjergji Cukali besohet se është porositësi i vrasjes me eksploziv të mbetur në tentativë. Burime për mediat bëjnë me dije se ky i fundit i ka premtuar 40 mijë euro dy vëllezërve Jamaku, për eliminimin e Gjon Menës.
Fillimisht ai u ka dhënë atyre 10 mijë euro, duke i premtuar se do i jepte 30 të tjera në momentin e eliminimit të 32-vjeçarit. Njëri nga vëllezërit ishte marrë me krijimin e lëndës plasëse, ndërsa tjetri kishte për detyrë ta vendoste poshtë makinës luksoze të Menas.
Cukali ka miqësi me persona të njohur të botës si krimit, mes tyre edhe Emiljano Shullazi. Akuzat që rëndojnë mbi të janë të shumta, duke filluar nga “pengmarrje”, “armëmbajtjet pa leje” “vrasje me paramendim” dhe “shpërndarje droge”. Për herë të fundit ai u arrestua në 12 Prill 2018, pasi kishte shkelur masën e sigurisë, “arrest shtëpie”.
Ndërsa në Korrik të vitit 2016 ai u arrestua së bashku me 16 persona të tjerë si pjesë e një rrjeti kriminal që shpërndante kokainë në Tiranë. Ky grup drejtohej pikërisht nga Cukali, dhe sipas policisë, fitimet e tyre shkonin në 50 mijë Euro në muaj.
Më 24 Nëntor 2006, Gjykata e Krimeve të Rënda e dënoi me 10 vite burg Gjergji Cukalin me akuzën e heqjes së paligjshme të lirisë ndaj shtetasit Fajton Demirlika në vitin 2004 në rrugën “Myslym Shyri” pas një konflikti për 100 mijë euro. Cukali përfitoi amnisti dhe doli pas disa vitesh.
Mëngjesin e 31 majit 2019 Policia e Tiranës njoftoi se ka bërë të mundur arrestimin e Gjergj Cukalit, ku është akuzuar për një vepër të rëndë penale, atë të vrasjes me paramendim. Hetuesit pretendonin se kishin prova të forta që vërtetojnë përfshirjen e tij në vrasjen e ish-efektivit të policisë Arben Bilali me 30 janar 2019. Cukali u lirua disa muaj më vonë pasi gjykata e Apelit dha masën e sigurisë “detyrim paraqitje”.
