Kreu i Grupit Parlamentar të PS, Taulant Balla ka deklaruar se nesër do të zgjidhet Presidenti i ri i Republikës. Nga Fieri, Balla bëri të ditur se nesër në orën 18:00 socialistët do të bëjnë publik emrin e presidentit të ri. Balla komentoi edhe kandidatët potencial që mund të zëvendësojë presidentin Meta pas përfundimit të mandatit më 24 korrik. Kreu i Grupit Parlamentar të PS tha se është pyetur për emrin e Gramoz Ruçi dhe Fatos Nanos, nëse do të jenë kandidatë të maxhorancës.
“ Një koleg me pyeti për Gramoz Ruçin, ju më pyesni për Fatos Nanon. Natyrshëm që këta dy emra për mua janë gjithmonë emra që e meritojnë të jenë Presidentë të Republikës, por duhet të jemi shumë korrekt në atë që transmetoni ju si lajm. Kryesia e partisë socialiste dhe grupi parlamentar janë dy institucionet që mblidhen për të disktuar për emrin që do të propozojmë zyrtarisht, dhe ai do të jetë Presidenti i ri përsa kohë që opozita për asnjë moment nuk e mori përgjegjësinë e një procesi që duhet të ishte i përbashkët. Ata të vinin me propozime, ne i garantuam që propozimet e tyre do ti marrim seriozisht. Nuk donin të bëheshin pjesë e këtij procesi. Tani raundin e 4 e kemi ne dhe kam bindjen e plotë se nesër në orën 18:00 do të zgjidhet Presidenti i ri i cili merr detyrën në 24 korrik”, theksoi ai.
I pyetur nëse do të jetë Majlinda Bregu propozimi i tyre duke qenë se opozita nuk e propozoi, Balla u shpreh: “Unë përsëri do të vazhdoj të insistoj që emri që ju përmendni apo emra të tjerë janë shumë të vlerësuar ndaj nuk kemi dashur që të bëjmë një debat publik për emrat. Mund të kishim bërë nje negociatë të mbyllur sepse duhet të tregojmë respekt për njerëzit që janë pjesë e kësaj gare. Hedhja me pa të drejtë e shumë emrave nuk i bën mirë kredibilitetit të procesit. Ne do të shkojmë nesër maksimumi në orën 12:00 me një emër të depozituar bashkë me firmat mbështetëse”.
