Agim Cana ishte njëri nga shënuesit në fitoren e Prishtinës 1-3 ndaj Crvena Zvezdës, në stadiumin “Marakana” të Beogradit. Gjithçka ka ndodhur në vitin 1983, pra ekzaktësisht 33 vjet më parë dhe sot është kujtuar në Instagram, nga djali i Agimit, Loriku, ish-kapiteni i ekipit tonë Kombëtar. Ndërkohë që edhe Cana senior, tashmë 6o vjeç, kujton atë fitore historike ndaj gjigandit jugosllav të futbollit.
“Për të mbështetur skuadrën në atë kohë, kanë udhëtuar nga Prishtina rreth 10 mijë tifozë, të cilët kanë thirrur në stadium EHO…EHO dhe për këtë rreth 2000 prej tyre u arrestuan, pasi e konsideruan që thërrisnin Enver Hoxha. Në fakt tifozët u justifikuan, që kjo ishte një thirrje internacionale futbolli. Pas përfundimit të takimit – vazhdon komentin e tij Agim Cana – grupi i Arkanit, Delije, që edhe tani janë ultrasit e Zvezdës, na rrahën ne lojtarëve një nga një, gjatë të gjithë natës në stadium”. Cana ka shënuar golin e barazimit ndaj Crvena Zvezdës së madhe, ndërsa goditjen finale ia dha Fadil Vokrri me një dygolësh të tij, i cili më pas e vazhdoi karierën me uniformën e rivalëve të Partizanit të Beogradit.
