Nga shpërthimi i një bombe në hyrjen e një spital , të paktën 30 persona kanë mbetur të vrarë. Ngjarja ka ndodhur në qytetin Kueta, në pjesën jugperëndimore të Pakistanit.
Policia bën me dije se nga shpërthimi kanë mbetur të plagosur edhe dhjetra persona të tjerë.
Deri tani askush nuk e ka marrë përgjegjësinë për sulmin, ndërsa autoritetet në provincën Baloçistan thanë se po zhvillohen hetime.
Mësohet se ngjarja ka ndodhur, pak kohë pasi trupi i i një avokati të njohur të vrarë ishte sjellë në spital. Po ashtu, ende mbetet e panjohur se kush kishte dorë në vrasjen e avokatit, Kilal Kasi, i cili u qëllua sot më herët me të shtëna nga armë ndërsa shkonte në gjykatë.
