Nga Zirkon Disha, aktivisit i Shoqërisë Civile.
Çdo punonjës i administratës ndihet i detyruar për t’u paraqitur më 30 qershor në votime! Kam biseduar me dhjetra punonjës të ndryshëm, që përpos bindjeve, ideve, ato më 30 qershor duhet të paraqiten në qëndrat e votimit dhe të hedhin votën për kandidatin! Madje, duhet të jenë aty së bashku me fëmijët madhorë, me burrin, gruan, etj…
Situata është sa qesharake, kritike, bajate deri në neveri. Më 30 qershor do të kryhet një krim zgjedhor, një krim i cili nuk ka të krahasuar me dosjet e Durrësit, Dibrës, etj…
Më 30 qershor do të ndodhë “nënshtirimi kolektiv” i nëpunësve të administratës, me të cilët ne takohemi thuajse çdo ditë. Njerëz të cilët paguhen per intelektin, edukimin, pavarësinë e mendimit, autoritetin profesional etj…më 30 qershor do të jenë shëmtia.
Më 30 qershor fillon depersonalizimi kolektiv i “elitës” që punon në zyrat e shtetit, Rilindja kryen aktin më regresiv që mund të detyrojë të bëjë një komunitet. Akte te tilla horror-thriller mund t’i ndeshësh vetëm në filma fantazi, ku forca magjike apo dukuri jashtokesore ndikojnë në degjenerime të kësaj natyre.
Mund të shpresonim që kjo gjë të mos ndodhte, një eksperiment social-ekonomiko-politik të mos ndodhte. Ky eksperiment është i së njëjtes kategori me eksperimentet naziste mbi çifutët, është i së njëjtës kategori me ekperimentet psikologjike të trajtuara në filma, është një eksperiment rilindas që do të krijojë hendeqe të pashlyeshme në ndërgjegjen e kombit!
Ky eksperiment po ndodh nën forcen e armëve të policisë, ushtrisë, dhunën e pashembullt të drejtuesve të institucioneve “demokratike” të cilët i kanë vendosur pononjësit nën zgjedhje. Ose vendin e punës, ose nënshtrimin.
Përpjekja për të ndaluar këtë maskaradë social-ekonomiko-politike është luftë me “zombiet”, një betejë e humbur. Nëse një votë në Durrës, Dibër kushtonte 3 mijë lekë, një votë nesër është e barabartë me pagën e një viti. Me së paku, 360 mijë lekë. 300 herë më shumë!
Kjo do të jetë dita më e shëmtuar, më stresantja, më kancerozja që ka parë një vend, një popull.
Dita kur shoqëria shqiptare u kthye në shoqëri eksperimentale zombiesh!
