Më 10 Janar 1991 një grup intelektualësh çamë të angazhuar, si: Abaz Dojaka, Arshin Rexha, Sali Bollati, Hilmi e Lutfi Saqe, Remzi Sula, Petrit e Hilmi Kasemi, Resul Taipi, Emin e Ferhat Sejko, Vehip Dojaka etj., deklaruan krijimin e Shoqatës Patriotike “Çamëria” dhe me anë të një deklarate të afishuar njoftuan botërisht themelimin e saj, e cila u miratua pak ditë më vonë duke u zyrtarizuar si Shoqata Patriotike “Çamëria”.
Shoqata Patriotike “Çamëria” është e para organizatë e krijuar nga një popullsi e martirizuar, e cila kishte pritur, ëndërruar dhe besuar fort në këtë mundësi. Kështu ajo solli një ndryshim të madh në rishtrimin e të drejtave të mohuara të shqiptarëve të Çamërisë, pra ridaljen në dritë të këtij problemi.
Tek kthen kokën pas në zhvillimet nëpër të cilat ka kaluar angazhimi ynë, natyrshëm ndjen respekt dhe vlerësim për ata që të parët hodhën themelet e kësaj udhe të mbushur plot me sfida.
Çdo përvjetor na jep mundësinë të hedhim vështrimin nga e shkuara për të orientuar më drejt përpjekjet tona në të ardhmen, për të realizuar kërkesat që u sanksionuan para 25 vitesh në programin e Shoqatës ku më kryesorja ndër to është kthimi në Çamëri.
Sot, është dita të vlerësojmë dhe përulemi me respekt para kontributit të bijve e bijave të Çamërisë, që në tërë këta vite kanë besuar fort në realizimin e aspiratës sonë të përbashkët. Respekt për kontributin e çdo shqiptari, brenda dhe jashtëvendit, vlerësim dhe respekt për këdo që na ka mbështetur në këtë rrugëtim të vështirë, të mbushur me sfida e plot pengesa nga jashtë e shumë herë edhe nga brenda vendit.
Çështja Çame sot ndodhet përpara një realiteti të ri. Në këtë realitet të ri është e rëndësishme që Shoqata Patriotike “Çamëria” të mundohet të orientojë sa më mirë përpjekjet e saj në të ardhmen në funksion të realizimit të kërkesave të programit të saj. Ajo ka qenë, është dhe do të mbetet edhe në të ardhmen shtrati ku gërshetohen të gjitha kontributet për zgjidhjen e Çështjes Çame.
Bashkë me urimin e përvjetorit të krijimit, shprehim bindjen, se sot më shumë se kurrë, shqiptarët e Çamërisë janë më të vendosur në angazhimin e tyre për zgjidhjen e Çështjes Çame.
Bëjmë gjithashtu me dije se ditën e Martë, date 16, ora 17:00 në ambjentet e Hotel Tirana do të organizohet aktiviteti përkujtimor me rastin e 27 vjetorit te krijimit të Shoqatës.
Jeni te ftuar te merrni pjese!
