Kreu i Partisë Demokratike Lulzim Basha u kërkon mediave që të angazhohen bashkërisht për zgjedhje të lira dhe ndershme
Gjatë takimit për 26 vjetorin e themelimit të gazetës së parë opozitare Rilindja Demokratike, Basha ka shprehur mirënjohje dhe respekt për të gjithë punonjësit e medias dhe tha se ishte i hapur edhe ndaj mediave kritike të opozitës.
Kreu i opozitës tha se mbështet çdo përpjekje për ruajtjen e pavarësisë së medias dhe 5 janarin ai e konsideron si ditën e shtypit të lirë në Shqipëri.
Basha: Dua t’i bëj thirrje mediave të vendit përfshirë mediat kritike me opozitës, të bashkohemi sot për zgjedhje të lira dhe të ndershme. Të luftojmë së bashku për të zhdukur njëherë e mirë blerjen e votës. Dua ta pohoj para jush; prej të vërtetës ekzistojmë dhe prej asaj do të fitojmë. Kam qenë dhe jam kurdoherë i hapur me mediat dhe bashkëpunues. Misioni im e përfshin këtë dimension. Refuzimi i kritikës është refuzim i vet idesë së ndryshimit. Kjo është një nga pikat ku unë dua të bëj ndryshim.
