Kryetari i Kuvendit Ilir Meta ka organizuar një seri aktivitetesh me rastin e 25 vjetorit të parlamentit pluralist në Shqipëri.
Zyra e shtypit pranë Kuvendit njofton se “aktiviteti do të organizohet në bashkëpunim dhe me Akademinë e Shkencave, në orën 11:00, në sallën e katit IV në Kryesinë e Kuvendit”.
Me këtë rast, në orën 19:00 kryetari i Kuvendit, Ilir Meta do të japë një pritje në Pallatin e Brigadave, ku do të jenë të ftuar drejtues dhe personalitete të larta të shtetit shqiptar, si dhe përfaqësues të Trupit Diplomatik në vendin tonë.
Seanca e parë parlamentare në kuvendin demokratik të Shqipërisë u mbajt më 15 prill 1991. Ishte parlamenti i dalë nga zgjedhjet e para pluraliste të 31 marsit 1991, pak muaj pas rrëzimit të sistemit komunist.
